HELL FIRE

Happy Sunday to everybodi..to both those wen go church and those wen siddon 4 house dey watch movie...dey play computer game...dey do bad bad things....and so on and so forth!

Anyways 4 my church the message today na about hell fire...

Pastor talk say the way people they behave this days e b like say them don forget say HELL FIRE na real something.

As pastor dey talk dey talk dey go...i come dey feel bad...i come promise God say all d bad bad things wen i dey do i go stop them. Because i no go like end up 4 place where the fire hot pass cooking fire...wen torment still dey ....even worm go dey chop u join...aya ya ya! God forbid Bad thing oh. I give my life to God again today. Me i wan go heaven...Abi u no go like go heaven....The pastor talk one serious thing...e say as u take dey live ur life for here ontop this earth na so u go take know whether u go reach heaven....e say make we no enjoy enjoy so tey we go forget say this earth no b ur own ...Na eternity b the most important thing...na there ur focus suppose dey...i don talk my own....i pray say this my talk go still make another person go think about im life. Oh sinner man repent...Hell no b sweet place oh......life no b two..so live am well.. .....If God forbid u die today..u fit Bold talk say u Sure 100% say na Heaven u dey go?

HAPPY SUNDAY AGAIN!

I Remain your sweetest edo sista

nothing do u!

nothing do me!!

Cockroach Day!

Sorry oh all my very speacial readers as e don tey since i reach this my blog.

Many tins don dey happen 4 my life since then n na serious wa i don dey!

E get as my day just b yesterday...so as i reach house i com say i make i loosen my self abi how dey dey talk am..."Unwind" with movie wen i don watch like one hundred times before "JENIFA"......anyways as i siddon 4 ground dey chop biscuit dey drink juice dey laugh......the next thing i just see one lonely cockroach waka come myside....my laughter b wan choke me...i come jump up.....the next thing d cockroach wan come show me say im get some skills wen i never see b4....e run around 4 circle....come do im wing one two up n down ...i swear im look me straight into my eyes ...b4 i blink e don fly reach d other side of my room..b4 all this one i don carry ammunition(long broom).....i must confess i dey fear cockroach pass anything....as d cockroack fly reach d other side of my room ... e just dissapear...i come look look look...i no see am again. after i don feel safe again continue to dey watch my JENIFA.......

25mins come pass then una no go believe wetin happen to a whole me wen dey fear cockroack pass rat! i just feel one tin dey tickle my back i come jump up ahhhhhh Mr cockroach don show again and na 4 inside my cloth e enter to tap me say im don arrive......Ogene.....Jesu....Olodumare......Osanobulah...i almost faint!i just dey jump dey jump....after all dat jumping shey una go expect say i go slaugther d cockroach send am to people wen dey chop cockroach mk dem use am take cook soup for such an attrocity...but guess wat....d cockroach dribble me dribble me..come run commot from d room....hummm! as for me na that one better pass..as i no fit kill am mk e go another person room go disturb them.

Yes...shame on me to dey fear cockroach and anything wen resemble dier family...i no dey shame put.....lol... but be assured e no go happen again lie lie...i don flit my room so no cockroach or em extended family fashioned against me can prosper in my room!

I remain ur Sweetest Edo Sista

Nothing do u !

Nothing do me!!

To all my Sweetest Sistas + Happy St. Falen-tines Day!!

For the past one week now...i just dey hear some kind nonsense stories abt how some people wen i know dey suffer suffer inside something wen suppose be good thing...anyhow this na my advise to all dem sweet sistas out dere.....

If man want u, e no get anybody wen go fit stop am.

If man no want you, e no get anything wen go make am dey with u.

No dey make stupid excuses for anyman stupid behavior.

Make u use ur head take make decision so as to keep ur heart from any breakage.

No try change ursef 4 relationship wen no get head n tail.

Jeje na the answer.

If u breakup with man cos e take u do yeye …. My dear …e no get as una wan b friends..tell am make e carry him wahala dey go with him friendship.

Person wen true true b ur friend no go take u do yeye…therefore say bye bye to rubbish.

If u feel say man wen u dey with just dey drag u up n down like goat….my sister 4 u to think am in d first place e mean say…na so ur situation true true be. E wise make u accept the true situation ….and find solution.

No stay with man n dey think 4 ur mind say one day one day things go better. After one more year u go vex with urself say u no waka wen u wan waka b4.

Na only urself u fit control 4 inside relationship…u no fit control anoda person.

Run from any man wen get plenty plenty children ..from plenty plenty women. If him no marry dem wen e give them belle…why u think say ur own wan come different.

Make sure say u get ur own set of friends…make dem dey different from im own friends.

Make sure say u draw line wen go guide how any man go to treat u. no dey take rubbish from anyman.

If anytin dey bother u, make sure say u open ur mouth talk am(no go dey shout shout)

No be everything u go open ur mouth tell man…because one day na one day e go take am curse u!!!

No woman fit change any man…change dey come from person belle n heart. Na personal decision.

Never u make any man feel say e important pass u…even if e go all the school for this world from Harvard to Lincoln or even if him Job better pass ur own.

No treat any man like a..”QUASI-god. .Na man e b…nothing more…nothing less.

Make no man define who u b. define ursef by ursef!

No borrow another person MAN. Because d owner go collect am one day..or d man go run by him self go him owner!

Listen to this all ye SHAPIROS: “If the man wen u dey with…cheat on him ex-girlfriend or wife…come be with u….my sister wear ur taekwondo belt cos that man go soon find who him and am go dey cheat on u.”


Man go treat u d way wen u let am treat u.

No be all men get LEG and ATTITUDE !

we still get some angels wen be like this out there!!!

No be only u suppose dey bend for relationship…according to d oyinbo man: Compromise is a street.

Wen u end one relationship…make u take out time take treat ur brokenheart & e no dey interesting to dey carry wahala up n down..…. No carry putmanto ,iron box, Ghana must go of trouble from ur old relationship enter ur new relationship…drop them 4 outside…infact put dem 4 dustbin !

No find man wen go complete u…relationship na with two whole people….find person wen go compliment u…no go dey find supplementary person

Dating na fun…e no mean say the thing must end up 4 marriage…sha use ur head.

No dey make urself totally available to man…cos as a human being e go start to dey take u 4granted small small.

No go dey commit to man wen u know say e no b d kind person u wan b with.If he no b wetin u want keep am 4 ur side …open ur eyes well well( I no say make u turn to oh…just use ur sense).

Make sure u share this my talk with other sweet sistas…U go make person smile , u go also make person re-think the choice wen she just makeand u go make anoda woman prepare hersef.

According to man Aristotle: e talk say Love is composed of a single soul inhabiting two bodies.

LOVE NA GOOD THING.....AND AS ST.FALEN-TINE DON LAND MAKE WE ALL MAKE SURE SAY WE DEY CELEBRATE AM WITH TRUE HAPPINESS FROM OUR BELLE!!! N O DECEIVE YA SEF!!

HAPPY FALEN-TINES DAY!

I remain ur sweetest edo sista !
Nothing do me !!
Nothing do u…!!!

Jesu Christi+Pidgin Phonetics

Na Wa......Wetin b this????? I dey browse jeje on my own wen i see this wonderful foto!! Wetin this man wan talk? Na woman e no get or na money e dey find!! Jesu Christi abeg deliver us from all this madness.....

This aside....una no go believe wetin happen right ontop my head for saloon .... i dey one of those posh saloons in lagos dey do my hair. Na one onyibo guy(Lebanese) dey do my hair so i guess wen one woman enter the saloon she come feel the need to speak phonetics...Only 4 d woman to speak this english with plenty phonetics....Excuse me is there Chance.....I almost scatter laughter ... but i say make i just repect my self cos person when fit speak that kind english and still dey blow phonetics untop am obviously na person wen get home trouble!! Lol....
Anyways i remain ur Sweetest Edo Sista
Nothing do me!
Nothing do u!!

Na here i wan start!+Winter in d Sun

As my blog name talk am ...i be Sweetest Edo Sista...and e also talk say life get as e be..abi una no agree say life get as e be?....sorry oh..all of una wen no understand pidgin english..this na d only way i fit unleash everythin wen dey happen 4 my big life!



I be 25 year old beautiful girl...forget all this pidgin wen i dey blow....for pure english u fit classify me as Drop Dead Gorgeous...no be joke....I decide say make i join this blog community cos i don tire 2 contain all the big big wonderful things wen they happen 4 my life. For instance today for inside plane...one man wan rack me...for my own seat...all of us buy d same ticket(pardon apart from business class....na economy we siddon) i siddon for my seat jeje wen d man just waka come my side say..MOVE INSIDE! i turn look d man with im Winter jacket for inside Nigeria HOT SUN.....i first look d man like Excuse me young man ...u well so?!!



I con speak clean english make e 4 undersand...You could aleast say excuse me u are seated on my seat...Sir, dont u think its very rude to say MOVE INSIDE(Like say na im papa buy d aircraft)....d next thing d man say shut up...people wen siddon near me con dey look the man like dis man well so!...i con say...Anyways this is my boarding pass and this is my seat....shey after that u go expect say d man go carry im and e winter jacket go im seat jeje....no oh..my Winter in d Sun brother decided to say more....The next i hear na...I WILL JUST BEAT U HERE!!!! At that point i just scatter laugh!!! My goodness...people true true dey crase....4 sit wen no b ur own!!! Sha sha...as i start to dey laugh...every bodi wen siddon close start 2 dey laugh too...my winter in d sun guy come use shame go siddon 4 corner!!! Na real Wa!!!!



Anyways make una WELCOME to my blog....i pray say una go fit understand as i dey type dey go everyday!



I remain ur Sweetest Edo Sista.....nothing do me...nothing do u!!